كيف تختار برنامج المونتاج المناسب لك؟؟؟

اول شي اعتذر على فترة الانقطاع كانت ظروف خارجة عن الارادة وان شا الله نعود بقوة

حبيت اتكلم اليوم عن البرنامج اللي راح نبدأ نتعلمو سوا ودا البرنامج ابغى الجميع في البداية يقتنع فيه بعدين نبدأ نشتغل عليه

في البداية خليني اقولكم على الخيارات اللي عندنا
final cut – Adobe premiere – Sony vegas – pinnacle – ulead video studio – imovie – movie maker 

طبعا البرامج كثيره لكن اشهرها هذي البرامج انا ماراح اكون متعصب لبرنامج معين لاني اشتغلت علي برامج كثيره جدا واعرف كل برنامج وعيوبو

بس خلينا نسمع تجاربكم برضو عشان نستفيد

خليني بتقسيم دي البرامج الى تلاته اقسام
imovie – movie maker
هادولا البرنامجين يعتبرو برامج جدا بسيطه وبدائية الى حد كبير واشياء كثير ما نقدر نسويها بدي البرامج بس دا ما يمنع انو نبدع من خلالها بالنسبه هل هي احترافية اكيد لا هل هي عمليه اكيد نعم ميزة هذه البرامج انها ما تحتاج جهاز قوي ولا تعلق عليك ولا تعطلك وغالبا ما تكون سريعه وسهله في الاستخدام

يعني من الآخر المبتدأين نسيبلهم دي البرامج بس لازم يعرفوها المحترفين عشان لا يكونو في مواقف محرجه

المجموعة التانيه من البرامج وهي برامج نصف احترافية
pinncle – ulead 

هادي البرامج تقريبا نص احترافية يعني زي اللي يبغى يجرب عالم المونتاج بس ما عندو جهاز قوي او واجه صعوبة مع البرامج الاحترافية مو مشكله يدخل على دي البرامج فيها خيارات اكتر من المجموعه الأولى وتحتاج جهاز شويه ماشي حالو عساس تشتغل معاك تمام لكن بشكل عام اذا كنت حابب تجرب مهاراتك قبل ما تتهور وتشتري جهاز قوي فعليك بدي البرامج منها تختبر نفسك وقدراتك ومنها تتمرن الين ما تشتري الجهاز اللي تقدر تشتغل عليه براحتك

الخلاصه مهما اتقنت دي البرامج ماراح تكون محترف حتى تتقن البرامج الاحترافية

المجموعه التالتة
final cut – premiere – sony vegas 

هادي البرامج الاحترافيه اللي تحتاج عشان تشتغل عليها اجهزه من العيار الثقيل واقصد تشتغل عليها شغل احترافي يعني اقل شي ممكن تشتغل عليه هادي البرامج جهاز يكون اتنين جيجا الرام والهارديسك اقل شي ١٢٠ جيجا ويكون المعالج كورتودو فوق الاتنين يفضل وكرت الشاشه يكون اقل شي ٢٥٦بس دا ازا كنت تستعمل الوندوز بس ازا كنت تستعمل الماك هنا يختلف كل شي لأنو نظام المااك يدعم الجرافيكس بقوة فما يحتاج يكون جهازك قوي بال اللهم الرامات يعني اتنين جيجا جدا مناسب
بعد كدا دي البرامج تكون مليانه خيارات واضافات وشغل يعني تحتاج عشان تبدع فيها الخبره اللي تكون سلاحك كل ما اشتغلت اكتر كل ما زادت خبرتك وكنت عارف اكتر بالشي اللي بتسويه وتزداد ثقتك بنفسك في عالم المونتاج
تحتاج دي البرامج دورات وطويله تكون عشان تتقنها لكن انا صراحة ما وجدت افضل من انو الواحد يبدأ يشتغل في مشاريع متعدده يسوي فيديو كليب يسوي افلام وثائقية اشياء كتير الين ما يتعود على الواجهه والاضافات وزي ما قلت يحتاج خبره كبيره

طبعا لو اتعلمت واحد من دي البرامج حتلاقي الباقين سهل تعلمهم لأنهم جدا متقاربين في الواجهه والخيارات بس الاختلافات بسيطه

الخلاصة تبغى تحترف اشتري جهاز واشتغل على دي البرامج

تقريبا كدا غطيت معظم برامج المونتاج واللي تكون غالبا مهمة في البداية انك تتعرف عليها كلها لأنو احيانا يجيك شغل ما يحتاج تستعمل فيه البرنامج القوي فتستعمل برنامج بسيط واحيانا يكون الشغل يحتاج ومن هنا وهنا يعني شدوو حيلكم

اي سؤال بالنسبة للبرامج انا موجود

انا اشتغلت على كل البرامج في دا الموضوع البرنامج الوحيد اللي ماحصللي الشرف اتعامل معاه ابدا ولا قد نزلتو في جهازي قبل كدا
sony vegas
لأنو ابدا ما احتجتو بعد ما استعملت البريمير

اي احد عندو خبره يفيد ونستفيد